Samskip segir að ekki sé verið að flytja til neina starfsemi Samskipa á Íslandi og höfuðstöðvar Samskipa séu og verði áfram hér á landi. Félagið segist hafa þurft að grípa til ráðstafana vegna efnahagsástandsins og farið verði í 3ja skipa kerfi í stað 4ra skipa kerfis áður. Jafnframt hafi starfsfólki verið fækkað.

„Eignarhaldsfélagið Samskip BV er skráð í Hollandi og hefur verið það síðan í lok síðasta árs. Eignarhaldsfélagið Samskip BV er móðurfélag Samskipa hf., sem er skráð félag á Íslandi, Samskip Multimodal Container Logistics BV, sem er skráð félag í Hollandi, og Samskip Logistics BV, sem einnig er skráð félag í Hollandi. Mörg fleiri dótturfélög, sem skráð eru víðsvegar um heiminn, tilheyra starfsemi Samskipa.

Með auknum umsvifum Samskipa á heimsvísu hefur hlutur Samskipa á Íslandi eðlilega farið minnkandi í heildarstarfseminni. Það skýrist hins vegar fyrst og fremst af auknum umsvifum erlendis en ekki minnkandi starfsemi hér heima. Þvert á móti hefur markaðshlutdeild Samskipa vaxið jafnt og þétt á Íslandi og starfsemi félagsins verið blómleg. Samdráttur hefur hins vegar verið fyrirsjáanlegur á Íslandi og því var gripið til ýmissa hagræðingaraðgerða innan félagsins fyrr á árinu til að mæta minni tekjum.

Þeir atburðir sem síðan urðu - og engan óraði fyrir - hafa hins vegar leitt til þess að Samskip þurfa að draga meira saman seglin. Þær aðgerðir sem nú verður gripið til fela í sér að siglingaáætlun félagsins verður breytt. Farið verður í 3ja skipa kerfi í stað 4ra skipa kerfis áður. Jafnframt hefur starfsfólki verið fækkað," segir í tilkynningu Samskipa.