Nýr búningur flugfreyja Icelandair.

Icelandair gerir miklar breytingar á þjónustu sinni á morgun. Ný sæti og skemmtikerfi eru komin í flugvélar félagsins, nýtt farrými verður opnað og flugliðar klæðast nýjum einkennisbúningum. Þá verður framboð á veitingum aukið en farþegar þurfa að greiða fyrir matinn.

Fram kemur í tilkynningu frá Icelandair að svonefnt Economy-Comfort  farrými verði tekið í notkun á morgun.  Um er að ræða  farrými með aukinni þjónustu og meira rými fyrir hvern farþega en í almennu farrými.  Economy-Comfort farrýmið er fyrir aftan SagaClass farrýmið í flugvélum Icelandair. Sætin eru þau sömu og í almennu farrými, en aðeins er selt í fjögur sæti af sex í hverri sætaröð og því er miðjusætið jafnan laust.

Þá verða einnig teknir í notkun nýir einkennisbúningar hjá Icelandair, sem eru unnir af hönnuðinum Steinunni Sigurðardóttur. Við hönnunina byggði hún mynstur og efni á íslenskri náttúru og snið og merkingar á rúmlega 70 ára sögu fyrirtækisins og íslenskri flugsögu. Búningarnir eru dökkbláir og hvítir. 

Um borð mun einnig heyrast ný tónlist sem er sérsamin fyrir Icelandnair af Einari Erni Benediktssyni, Birgi Curver og Finnboga Péturssyni.

Fram kemur í tilkynningunni frá Icelandair, að á undanförnum dögum hafi bókanir fyrir flug hingað til lands aukist til muna frá því sem var á sama tíma á síðasta ári og það hafi að hluta til bætt upp fyrir samdráttinn á heimamarkaði. Erfitt sé að gera sér grein fyrir þróuninni næstu vikur og mánuði. Síðustu daga hafi innflæði bókana aukist hér á landi á ný. Mikill fjöldi Íslendinga sé búsettur í nágrannalöndum, þar á meðal margt barnafólk sem ættingjar á Íslandi vilja heimsækja.