Frá undirritun samnings Fangelsismálastofnunar og Ekron í dag mbl.is/Júlíus

„Við lítum svo á að þetta sé mjög mikilvæg endurhæfing fyrir okkar skjólstæðinga svo þeir geti fótað sig í lífinu að lokinni afplánun. Menn sem hafa setið lengi í fangelsi missa gjarnan tengingu við samfélagið. Þarna gefst þeim kostur á að læra atvinnutengda starfsþjálfun og hljóta endurhæfingu,“ segir Páll Winkel forstjóri Fangelsismálastofnunar um nýgerðan samning við áfangaheimilið Ekron um starfsþjálfun fyrir fanga.

Samningur Fangelsismálastofnunar og Ekron var undirritaður í dag. Um er að ræða tilraunaverkefni til sex mánaða og verður samningurinn endurskoðaður að þeim tíma liðnum.

Ekron er sértæk einstaklingsmiðuð atvinnutengd starfsþjálfun og endurhæfing fyrir einstaklinga með skerta vinnufærni sökum afleiðinga af áfengis- og vímuefnasýki. Markmiðið er að aðstoða fólk við að byggja sig upp fyrir framtíðina þannig að það geti tekið virkan þátt í þjóðfélaginu á ný.

„Það er gert ráð fyrir að þarna vistist menn sem eru að ljúka afplánun. Annars vegar að mennn ljúki síðasta hluta afplánunar hjá Ekron og hins vegar að þeir fari í tiltekinn tíma í endurhæfingu hjá Ekron og í framhaldinu ljúki þeir afplánun á áfangaheimili Verndar,“ segir Páll Winkel.

Hann segir að Fanglsismálastofnun muni fara í gegnum það hverjum sé treystandi, út frá öryggissjónarmiðum, til að nýta þetta nýja úrræði. Þá þurfi fulltrúar frá Ekron að samþykkja að taka við viðkomandi fanga.

„Meðan á dvöl hjá Ekron stendur, fylgist fagfólk okkar, sálfræðingur, félagsráðgjafi og fleiri, með viðkomandi fanga, líkt og gert er með þá sem dvelja á Vernd,“ segir Páll winkel.

Gert er ráð fyrir að einn til þrír fangar geti á hverjum tíma nýtt úrræðið.

„Við viljum stíga mjög varlega til jarðar með öll svona ný úrræði en þetta skiptir okkur afar miklu máli. Úrræði líkt og þetta er eitthvað sem hefur sárlega vantað inn í afplánunarferlið, að menn læri að vinna í lok afplánunar, hljóti betrun um leið og þeir taka út refsingu sína,“ segir Páll Winkel.