Sverrir Vilhelmsson

Innflutningur dróst saman á öllum sviðum í október, samkvæmt vefriti fjármálaráðuneytisins. Fyrr í vikunni voru kynntar bráðabirgðatölur um vöruskiptin við útlönd og samkvæmt þeim voru fluttar inn vörur fyrir 36,4 milljarða króna.

Innflutningsverðmætið minnkaði minnst á nauðsynjavörum eins og mat- og drykkjarvörum en margir innflytjendur hafa ekki getað átt eðlileg viðskipti við sína erlendu birgja á síðustu vikum sem skýrir eflaust ástæðu þess að verðmæti þessa innflutnings hefur ekki aukist samfara gengislækkuninni.

Hlutfallslega er minnkun innflutnings í október einna mest áberandi í innflutningi fólksbifreiða en hann dregst mikið saman í október auk þess sem mikill samdráttur var einnig í nýskráningum ökutækja í mánuðinum. Mikill samdráttur var einnig í innflutningi varanlegra og hálf-varanlegra neysluvara eins og heimilistækja og fatnaðar og þá var einnig nokkur samdráttur í innflutningi í eldsneyti og olíum en sá innflutningur er jafnan
mjög sveiflukenndur á milli mánaða, að því er segir í vefriti ráðuneytisins.

Verðmæti útfluttra sjávarafurða eykst á milli mánaða samfara lægra gengi krónunnar og sömu sögu má segja af verðmæti útflutts áls sem eykst þrátt fyrir lækkun á heimsmarkaðsverði. Erfitt er þó að meta hversu stór hluti útflutningstekna í október hefur skilað sér til landsins þar sem greiðsluskil hafa gengið erfiðlega og margir útflytjendur hafa þ.a.l. beðið sína kaupendur að bíða með greiðslur.