Tryggvi Jónsson, fyrrverandi aðstoðarforstjóri Baugs, starfar nú hjá Landsbankanum, nánar tiltekið í deild sem sinnir m.a. svonefndum erfiðum útlánum fyrirtækja sem eru í viðskiptum við útibúin, að sögn Gunnars Viðars, forstöðumanns lögfræðisviðs. Hann sagði aðspurður að Tryggvi Jónsson kæmi hvergi nálægt málum sem tengjast Baugi, 365, Jóni Ásgeiri Jóhannessyni eða félögum sem tengjast honum. Deildin sem hann starfaði í sinnti ekki stærri málum og málefni Baugs teldust ótvírætt til stærri mála.

Tryggvi hóf störf við bankann 3. desember 2007, fyrst til að sinna tilteknum verkefnum en síðan sem starfsmaður bankans. Þetta var ríflega fimm árum eftir að Baugsmálið hófst og um hálfu ári áður en dómur var kveðinn upp í málinu. Hann var því með hreina sakaskrá þegar hann byrjaði hjá bankanum en það breyttist í júní á þessu ári þegar dómur var loks kveðinn upp.

Ef sótt er um starf hjá Landsbankanum á heimasíðu bankans þurfa umsækjendur að svara hvort þeir hafi hreint sakavottorð.

Atli Atlason, starfsmannastjóri Landsbankans, sagði að almennt væru starfsmenn sem hefðu hlotið refsidóm ekki ráðnir til bankans en hvert tilvik væri metið fyrir sig. „Það fer eftir því hvert brotið er, eins og í öllum störfum,“ sagði Atli. Honum væri ekki kunnugt um að menn sem hefðu hlotið dóm vegna efnahagsbrota hefðu verið ráðnir til bankans.