„Það er fundað baki brotnu um efnahagsmál og framtíð kjarasamninganna,“ segir verkalýðsforingi á almenna vinnumarkaðinum. ASÍ og Samtök atvinnulífsins ræða stíft þessa dagana um mögulegar aðgerðir í kjaramálum og samstillt átak við endurreisn í atvinnu- og efnahagslífinu.

Sagt er að ef breið samstaða náist um sameiginlegar tillögur um umgjörð kjarasamninga á næstu árum megi vel vera að því verði síðar meir líkt við nýja þjóðarsátt. Forsendunefnd kjarasamninganna fundar í dag en niðurstaða mun þó ekki nást fyrr en leyst hefur verið úr yfirstandandi kjaradeilu stéttarfélaga og launanefndar sveitarfélaga. ASÍ hefur rætt við SA og kynnt stjórnvöldum aðgerðaáætlun frá ársfundinum í seinasta mánuði, þar sem m.a. er lagt til að sótt verði um ESB-aðild og stefnt að upptöku evru.

„Við erum líka tilbúin að stuðla að framlengingu kjarasamninga án þess að komi til verulegra breytinga frá því sem er í núverandi samningi og taka þ.a.l. á okkur talsverða skerðingu til þess að verja atvinnustigið og skapa ró á vinnumarkaði á meðan við förum í gegnum þetta erfiðleikatímabil,“ segir Gylfi Arnbjörnsson, forseti ASÍ.

Einnig vill ASÍ taka þátt í endurreisnarstarfi atvinnulífsins, m.a. með aðkomu lífeyrissjóða að fjárfestingu, og fjölmargar úrlausnir eru settar fram um að bæta greiðslustöðu heimilanna. Vilhjálmur Egilsson, framkvæmdastjóri SA, segir að almennt hafi verið mikill samhljómur í því sem SA og ASÍ hafa haldið á lofti. ,,Við vinnum mjög þétt saman,“ segir hann.