Eftir Bergþóru Njálu Guðmundsdóttur ben@mbl.is

Erlend blöð og tímarit hafa sum verið illfáanleg í verslunum að undanförnu. Skýringin er skortur á gjaldeyri til að leysa blöðin út.

Jana Sturlaugsdóttir hjá Pennanum-Eymundsson segir að erlend blöð og tímarit hafi ekki öll ratað á sinn stað í hillurnar að undanförnu. „Það er skortur á gjaldeyri og fyrir vikið gengur hægar að greiða erlendum birgjum. Flestir hafa þeir sýnt okkur skilning en þeir eru misstrangir þannig að við höfum ekki í öllum tilfellum náð að leysa út blöð. Þetta er eins hjá öllum, þeir sem ekki versla með mat, lyf eða eldsneyti eru ekki í forgangi.“ Hún segir þó minnihluta birgja stífa á reglum. „Flestir skilja að þetta er tímabundið ástand.“ Aðspurð segir hún helst hafa vantað Der Spiegel og Hello í búðunum. „En það er að birta til í gjaldeyrismálum og þá fer þetta strax að rúlla.“

Hannes Sigurbjörn Jónsson, framkvæmdastjóri Office 1, segir tregðu hafa verið í afgreiðslu erlendra blaða. „Blöðin frá Ameríku hafa borist eins og venjulega en við höfum lent í stoppi í þrjár, fjórar vikur með evrópsk blöð sem við fáum frá einum birgi í Bretlandi. Við erum þó búin að leysa þetta hjá okkur í bili svo við fáum erlend blöð í vikunni.“

Margrét Grétarsdóttir, verslunarstjóri hjá Griffli, segir lítið hafa vantað erlend blöð í þeirra verslunum. „Það hafa verið vandræði með Bo Bedre sem er væntanlegt í vikunni og Hello hefur ekki komið, þannig að við höfum aðeins orðið fyrir þessu, en þó ekki mjög alvarlega.“