eftir Þórð Snæ Júlíusson thordur@mbl.is

Skilanefndir þeirra banka sem hafa verið þjóðnýttir munu hitta erlenda kröfuhafa sína á fundum í lok þessarar viku. Skilanefnd Kaupþings mun funda með kröfuhöfum á miðvikudag, Glitnismenn funda með sínum á fimmtudag og skilanefnd Landsbankans heldur sinn fund á föstudag. Þetta verða fyrstu formlegu fundirnir sem erlendu kröfuhafarnir fá með skilanefndunum.

Á þessum fundum verður kröfuhöfunum, sem meðal annars eru margir stærstu bankar Evrópu, gerð grein fyrir hver staðan í þrotabúum bankanna sé. Samkvæmt heimildum Morgunblaðsins verður meðal annars farið yfir fyrstu vísbendingar um verðmæti þeirra eigna sem verða eftir í gömlu bönkunum. Í framhaldinu er vonast til þess að kröfuhafarnir muni verða tilbúnir til þess að vera með í ráðum um hvernig stíga eigi næstu skref. Þar er fyrst og fremst verið að horfa til þess hvort innheimta eigi eignir hratt eða hægt. Ef það er gert hratt fá þeir borgað fyrr en fá á móti minna upp í kröfurnar. Ef eignirnar eru innheimtar hægar þá ætti að fást meira fyrir þær.