Fulltrúar IMF á blaðamannafundi á Íslandi. mbl.is/Kristinn

eftir Ómar Friðriksson omfr@mbl.is

Ekki hefur enn tekist að tryggja að Íslendingar fái lán frá Norðurlöndum og öðrum ríkjum til viðbótar væntanlegri lánveitingu Alþjóðagjaldeyrissjóðsins (IMF).

Ilkka Kajaste, aðstoðarráðuneytisstjóri í finnska fjármálaráðuneytinu, sem á sæti í samstarfshópi Norðurlanda um aðstoð við Íslendinga, segir að málið sé bæði erfitt og flókið en það sé þó ekki skilyrði fyrir því að norrænar ríkisstjórnir styðji lánveitingapakka til Íslendinga að Íslendingar leggi fram ítarlegri upplýsingar.

,,Fulltrúar íslenskra stjórnvalda upplýstu okkur í síðustu viku um stöðu mála og mögulega aðstoð IMF. Það eru enn einstök mál, bæði lagaleg og efnahagsleg sem þarf að greiða úr. Það myndi að sjálfsögðu auðvelda okkur að átta okkur betur á ástandinu á Íslandi ef við gætum fengið frekari upplýsingar,“ sagði Kajaste og nefndi fjárlagagerð næsta árs sem dæmi um það en ítrekaði að það væru þó ekki nein formleg skilyrði fyrir framgangi málsins.

Kajaste sagði einnig að það myndi greiða fyrir úrlausn málsins og auðvelda pólitískar ákvarðanir ef lausn fyndist á lagadeilum við Breta og Hollendinga um Icesave-reikningana. „Við fylgjumst mjög náið með framvindu þess.“