Frá Alþingi. mbl.is/Golli

Þingmenn VG mótmæltu því harðlega undir kvöld, að frumvarp um fjármálafyrirtæki yrði tekið til þriðju umræðu. Samkvæmt frumvarpinu getur skiptastjóri þrotabús fjármálafyrirtækis m.a. annast áfram tiltekna leyfisbundna starfsemi þrátt fyrir að Fjármálaeftirlitið hafi afturkallað starfsleyfi fyrirtækisins.

Meirihluti viðskiptanefndar þingsins lagði í dag fram breytingartillögur við frumvarpið sem m.a. gera ráð fyrir að óheimilt verði að höfða dómsmál gegn fjármálafyrirtæki meðan á greiðslustöðvun þess stendur, nema mælt sé sérstaklega fyrir um heimild til þess í lögum eða um sé að ræða opinbert mál og refsiviðurlaga sé krafist. Þá sé heimilt að fresta meðferð dómsmáls gegn fjármálafyrirtæki meðan á greiðslustöðvun þess stendur. Markmiðið með þessu sé að tryggja, að fjármálafyrirtæki í greiðslustöðvun þurfi ekki að óttast málshöfðun íslenskra eða erlendra kröfuhafa meðan á greiðslustöðvuninni stendur og unnið sé að því að tryggja verðmæti eigna fyrirtækisins.

Ögmundur Jónasson, þingflokksformaður VG, sagði að frumvarpið hefði ekki hlotið þá umfjöllun í meðferð þingsins, sem flokkurinn teldi æskilega en í nefndaráliti fulltrúa flokksins í viðskiptanefnd þingsins segir m.a. að réttarfarslegt slys sé í uppsiglingu með samþykkt frumvarpsins. Því væri rétt að fresta afgreiðslu málsins. Sagðist Ögmundur mótmæla því að málinu yrði þröngvað gegnum þingið með þessum hætti.

Ágúst Ólafur Ágústsson, þingmaður Samfylkingarinnar, sagði að frumvarpið hefði verið til umræðu í viðskiptanefnd þingsins frá því á föstudag.  Hins vegar lægi á að setja þessa löggjöf til að bjarga verðmætum, verja eignir bankanna og koma í veg fyrir að þær verði kyrrsettar í Evrópu. Með ólíkindum væri að enn stjórnmálaflokkur reyndi að koma í veg fyrir það.

Ögmundur sagði að í frumvarpinu fælust álitamál sem vörðuðu stjórnarskrá landsins og hagsmuni íslensku þjóðarinnar og ekki væri sæmandi að Alþingi reyndi að þröngva málinu í gegn án nægrar umfjöllunar.

Sturla Böðvarsson, forseti Alþingis, sagði hins vegar að fyrir lægi nefndarálit bæði frá meirihluta og minnihluta viðskiptanefndar og því væri fyllilega eðlilegt að frumvarpið kæmi til þriðju umræðu nú.