NFU, norræn samtök starfsmanna fjármálafyrirtækja lýsa yfir eindregnum stuðningi við félaga sína á Íslandi í baráttu þeirra við að leysa úr þeim vandræðum sem alheimsfjármálakrísan hefur skolað á land á Íslandi.

Í yfirlýsingu sem Allan Bang formaður NFU og Jan-Erik Lidström framkvæmdastjóri NFU sendu frá sér segir að íslenska hagkerfið sé í stöðu þar sem íslenskir bankar, viðskiptavinir þeirra og starfsfólk standa frammi fyrir erfiðleikum af áður óþekktri stærð. Við þeim blasi að reisa úr rústum hagkerfi sem var nánast velt um koll með aðgerðum annarra.

„Við erum öll í þessu saman, ekki bara sem starfsmenn í fjármálafyrirtækjum, heldur einnig sem þátttakendur í alþjóðlegu efnahagslífi,“ segir í yfirlýsingunni.

NFU hvetur norrænar ríkisstjórnir og norræna seðlabanka til að styðja Ísland í baráttunni við fjármálakreppuna.

NFU er samtök stéttarfélaga starfsmanna í fjármála- og tryggingageiranum á öllum Norðurlöndunum. NFU er fulltrúi fyrir 160 þúsund starfsmenn á norrænum fjármálamarkaði.