Retuers

Eftir Magnús Halldórsson magnush@mbl.is

Vonir standa til þess að samkomulag um hvernig skaði innstæðueigenda á Icesave-reikningum Landsbankans í Hollandi og Bretlandi verði bættur muni nást í dag eða á allra næstu dögum. Í kjölfarið er vonast til þess að beiðni um lánafyrirgreiðslu frá Alþjóðagjaldeyrissjóðnum, IMF, verði tekin fyrir hjá sjóðnum, jafnvel strax eftir helgi.

Fimm manna sendinefnd embættismanna á vegum íslenskra stjórnvalda fundaði í Brussel í gær með fulltrúum Frakklands, sem forysturíkis Evrópusambandsins (ESB), með lausn á málinu að leiðarljósi.

Mikill þrýstingur er frá Evrópusambandsríkjunum að hvika ekki frá reglum ESB um tryggingarvernd innstæðueigenda. Í viðræðunum hefur þess meðal annars verið getið af hálfu Frakka, samkvæmt heimildum Morgunblaðsins, að samkomulag sem felur í sér minni tryggingarvernd en tilskipun ESB segir til um geti til leitt til áhlaups á banka í Evrópu.

Lánafyrirgreiðsla til Íslands, til viðbótar við lán frá IMF, er ekki fyrir hendi af hálfu ESB-ríkja nema samkomulag um lausn á ábyrgðum vegna innstæðna á Icesave-innlánsreikningunum liggi fyrir. Íslensk stjórnvöld vonast til þess að eignir Landsbankans í Bretlandi dugi að stærstum hluta upp í þær fjárhæðir sem falla munu á íslenska ríkið. 

Tilskipun ESB gerir ráð fyrir því að innstæður séu tryggðar upp að 20.887 evrum á vegum ríkisins þar sem banki er með aðsetur. Í versta falli munu íslenskir skattgreiðendur þurfa að ábyrgjast að minnsta kosti 600 milljarða króna.