mbl.is

Eftir Önund Pál Ragnarsson onundur@mbl.is

Sveitarfélög sem átt hafa í rekstrarvanda á undanförnum árum munu lenda í verulegum vandræðum á næstunni. Þetta sagði Karl Björnsson, framkvæmdastjóri Sambands íslenskra sveitarfélaga, á fjármálaráðstefnu þess í gær. Sagði hann útlitið ekki gott í rekstri sveitarfélaga á næsta ári, 30 milljarða rekstrarhalli skv. áætlunum sambandsins eða 20% af tekjum sveitarfélaganna. Þetta er algjört hrun í afkomu þeirra frá síðustu árum. Sveitarfélög mega ekki, lögum samkvæmt, gera ráð fyrir halla í fjárhagsáætlunum.

Árni Mathiesen fjármálaráðherra sagði á ráðstefnunni að heildartekjur ríkissjóðs drægjust saman um fjórðung á milli þessa árs og næsta, ekki síst þar sem stofnar tekjuskatts og fjármagnstekna rýrnuðu um meira en helming. Hann sagði ríkissjóð ekki aflögufæran um að rétta sveitarfélögin af. Fátt annað blasti því við en niðurskurður, enda sagði Halldór Halldórsson, formaður sambandsins, stöðuna þá verstu sem hefði sést. Sveitarfélög þyrftu að leita á náðir ríkisins. Hanna Birna Kristjánsdóttir borgarstjóri sagði að risastórt pólitískt loforð væri að segjast standa vörð um grunnþjónustu borgarinnar í núverandi ástandi.

Kristján Möller, ráðherra málefna sveitarfélaga, hefur látið breyta reglum um eftirlitsnefnd með fjármálum sveitarfélaga, svo að hún byrjar ekki sjálfkrafa á aðgerðum þótt henni berist fjárhagsáætlanir sem sýna hallarekstur hjá sveitarfélögum 2009. Þess í stað á hún að skoða slíkar áætlanir heildstætt og í ljósi ástandsins.

Kristján sagði á ráðstefnunni í gær að upplýsinga hefði verið aflað um fjárhagslega stöðu allra sveitarsjóða núna. „Markmiðið er að reyna að fá heildarmynd af fjárhagslegri stöðu allra sveitarfélaga í landinu,“ sagði Kristján á ráðstefnunni í gær. Um 90% sveitarfélaga hafa skilað inn upplýsingum. Kristján tjáði Morgunblaðinu í gær að ekkert þeirra væri komið í svo alvarlega stöðu að farið væri að ræða um róttækar aðgerðir á borð við greiðslustöðvun, stórkostlega hækkun útsvars eða sameiningu við önnur byggðarlög.