Bónus var oftast með lægsta verðið þegar verðlagseftirlit ASÍ kannaði verð á matvöru í lágvöruverðsverslunum og öðrum stórmörkuðum á höfuðborgarsvæðinu í gær. Nóatún var oftast með hæsta verðið í könnuninni. ASÍ segir, að vísbendingar séu um að verðmunur á milli lágvöruverðsverslana og annarra stórmarkaða sé að minnka.

Í Bónus var lægsta verð á 31 af 50 vörum sem kannaðar voru en Fjarðarkaup og Kaskó voru næst oftast með lægsta verðið eða í 7 tilvikum. Nóatún reyndist með hæsta verðið á 34 af 50 vörum sem skoðaðar voru en Hagkaup var næst oftast með hæsta verðið eða á 11 vörum.

Mestur verðmunur í könnuninni var á kílóverði af heilum ferskum kjúklingi sem var dýrastur 1070 krónur í Nóatúni og Fjarðarkaupum, en ódýrastur  525 krónur í Nettó sem er 104% verðmunur. Minnstur verðmunur reyndist hins vegar á kílóverði af forverðmerktum Skólaosti sem kostaði 1190 krónar í Bónus, Krónunni og Fjarðarkaupum þar sem veittur er 5% afsláttur af merktu verði við kassa, en 1253 krónur í öllum öðrum verslunum.

Í könnuninni var m.a. skoðað verð á nokkrum algengum bökunarvörum í jólabaksturinn, s.s. hveiti, sykri, smjöri, hnetum, súkkulaði og vanilludropum, og reyndist í flestum tilvikum talsverður munur á hæsta og lægsta verði þessara vara. Sem dæmi má nefna að 42% munur var áLjóma smjörlíki sem var ódýrast  147 krónur í Bónus en dýrast  209 krónur í Nóatúni, og 74% verðmunur var á glasi af vanilludropum sem kostuðu 97 krónur í Bónus en 169 krónur í Samkaupum-Úrvali.

ASÍ segir, að stærri pakkningar virðist ekki alltaf skila sér í lægra einingaverði. Strásykur frá Dansukker sé bæði til í 1 kg. og 2 kg. pakkningu í sumum verslunum. Í Hagkaupum, Nóatúni og Samkaupum-Úrvali sé hagstæðara að kaupa tvær kílóapakkningar en eina tveggja kílóa. Það sama eigi við um Konsum suðusúkkulaði sem bæði er til í 200 gr. og 300 gr. pakkningum í Hagkaupum og Nóatúni. Kílóverðið á minni pakkningunni sé í báðum verslunum lægra en á þeirri stærri.

Þá segir ASÍ að athygli veki að munur á hæsta og lægsta verði á þeim vörum í könnuninni, sem einnig voru skoðaðar í sambærilegri könnun í þessum sömu verslunum í mars, hafi í flestum tilvikum minnkað talsvert. Þannig hafi munur á hæsta og lægsta verði á Fitty samlokubrauði verið 77% í mars en sé nú 32% og munur á hæsta og lægsta kílóverði á banönum hafi veirð 153% í mars en er nú 83%. Þetta gefi vísbendingu um að verðmunur á milli lágvöruverðsverslana og annarra stórmarkaða sé að minnka. Þetta sé einnig i samræmi við niðurstöður sem verðlagseftirlitið hafi birt undanfarið um breytingar á verði vörukörfu ASÍ sem hefur frá því í vor hækkað meira í lágvöruverðsverslunum en öðrum verslunum.

Verkönnun ASÍ