Jóhanna Sigurðardóttir, félags- og tryggingamálaráðherra, hefur gefið út reglugerð um frest einstaklinga til að óska eftir greiðslujöfnun fasteignaveðlána sinna samkvæmt nýsamþykktum lögum um greiðslujöfnun fasteignaveðlána til einstaklinga.

Óski lántakandi eftir að greiðslujöfnun komi til framkvæmda á gjalddaga í desember næstkomandi þarf hann að skila umsókn til þeirrar lánastofnunar sem hann er í viðskiptum við, eigi síðar en þriðjudaginn 25. nóvember.

Eftir næstu mánaðamót þarf beiðni lántakanda um greiðslujöfnun framvegis að berast lánveitanda eigi síðar en 11 dögum fyrir gjalddaga eigi hún að koma til framkvæmda þá. Berist beiðni lántakanda eftir þann tíma skal greiðslujöfnun koma til framkvæmda á næsta gjalddaga þar á eftir. Lánveitandi getur þó veitt lántakanda rýmri frest en hér segir.

Allir sem eru með verðtryggð fasteginaveðlán hjá opinberum lánastofnunum, lífeyrissjóðum eða öðrum fjármálafyrirtækjum með starfsleyfi hér á landi eiga rétt á greiðslujöfnun, uppfylli þeir skilyrði laganna. Lántakandi skal koma umsókn sinni á framfæri við viðkomandi lánastofnun og skal hún vera umsækjanda að kostnaðarlausu, samkvæmt tilkynningu.