Páll Magnússon útvarpsstjóri segir fréttir. mbl.is/Árni Sæberg

Eftir Rúnar Pálmason runarp@mbl.is

„Það er ljóst að Ríkisútvarpið hefur verið aðgangshart og ég held að það sé það sem fer fyrir brjóstið á mönnum og það, eðlilega, förum við yfir,“ sagði Þorgerður Katrín Gunnarsdóttir menntamálaráðherra um stöðu Ríkisútvarpsins (RÚV) á auglýsingamarkaði en um hana er fjallað í nýju áliti Samkeppniseftirlitsins. Starfsmenn ráðuneytisins hefðu fundað með stjórnendum RÚV vegna málsins og það væri alveg ljóst að RÚV yrði að halda sig innan þess ramma sem því væri ætlaður á auglýsingamarkaði.

Þorgerður Katrín hyggst fara nákvæmlega yfir niðurstöður álitsins og eiga síðan fund með Páli Magnússyni útvarpsstjóra. Þá sagði hún ljóst að RÚV hefði breytt sinni hegðan eftir að ráðuneytismenn áttu fund með stjórnendum þess.

Eftir að Þorgerður Katrín fékk upplýsingar um að Skjárinn væri í erfiðri stöðu vegna samkeppninnar við RÚV setti hún á laggirnar starfshóp sem hefur tvö meginhlutverk; annars vegar að fjalla um stöðu RÚV á auglýsingamarkaði og hins vegar að fjalla um eignarhald á öðrum fjölmiðlum. Þorgerður Katrín sagði að tryggja yrði fjölbreytta flóru á fjölmiðlamarkaði, þar með talið varðandi prentmiðla. Niðurstaðan af starfi starfshópsins gæti allt eins orðið sú að RÚV yrði tekið að hluta til út af auglýsingamarkaði og um leið myndu tekjur þess skerðast. „En ég legg ríka áhersla á það að Ríkisútvarpið hagi sér almennilega og sé ekki í einhverjum leik sem verður til þess að aðrir fjölmiðlar eigi erfitt með að starfa hér. Það skiptir miklu máli og Ríkisútvarpið verður að átta sig á því.“ Gerðar væru ríkar kröfur til RÚV, bæði á siðlegum og lagalegum forsendum.

Þorgerður Katrín sagði að RÚV væri mikilvæg stofnun og yrði að gæta að hlutverki sínu hvað varðaði menningu og almannaþjónustu. Um leið mætti RÚV ekki haga sér þannig að það valtaði yfir aðra fjölmiðla.