Frá slysadeild Landspítala - háskólasjúkrahúss mbl.is/Sverrir

Eftir Ágúst Inga Jónsson aij@mbl.is

Um 3-400 íslenskir læknar dvelja erlendis um þessar mundir, ýmist við starf eða í framhaldsnámi. Ekki er talið líklegt að þessir læknar flýti heimför miðað við efnahagsástandið. Þvert á móti býst framkvæmdastjóri Læknafélags Íslands við að stór hópur lækna hverfi til náms eða starfa erlendis á næstu mánuðum.

„Efnahagsástandið mun örugglega hafa áhrif á okkar félagsmenn,“ segir Gunnar Ármannsson, framkvæmdastjóri LÍ. „Þeir sem það geta og hafa verið að hugsa um að fara í sérnám til útlanda munu flestir reyna að flýta því.

Á sama hátt eigum við ekki von á því að þeir sem eru í sérnámi flýti sér heim. Það mun ekki hjálpa til ef það á að spara í heilbrigðiskerfinu, bæði með því að segja upp fólki og hugsanlega lækka laun. Það verður ekki aðlaðandi fyrir starfsmenn sem eru erlendis að koma heim í slíkt umhverfi.“