Nemendur í Soffíubúð í morgun mbl.is/Ómar

Öllum framkvæmdum við Soffíubúð, félagsaðstöðu heimspekinema við Háskóla Íslands, hefur verið frestað þar til sviðstjóri Hugvísindasviðs, Ástráður Eysteinsson, kemur til landsins. Nemendur hófu setuverkfall í morgun þar sem þeir vildu mótmæla því að loka átti aðstöðu þeirra og breyta í skrifstofu.

Gunnar Júlíus Guðmundsson, formaður Soffíu, félags heimspekinema, segir í samtali við mbl.is að von sé á Ástráði til landsins á morgun þannig að líklegt sé að fundur verði haldinn með stúdentum á fimmtudag.

Að sögn Gunnars sendi Ástráður þeim bréf þann 3. nóvember þar sem þeim var tilkynnt að búið væri að ákveða að loka Soffíubúð og í staðinn fengju nemendurnir herbergi í kjallara aðalbyggingar HÍ sem sé mun minna. Áður höfðu félög heimspekinema og guðfræðinema fengið loforð um að þau fengju að halda Soffíubúð eða þeim yrði úthlutað sambærilegu húsnæði. Síðan hafi þeim verið tilkynnt í gær að þau yrðu að rýma Soffíubúð því framkvæmdir ættu að hefjast í dag. Jafnframt fylgdi sögunni að þau mættu ekki taka húsgögnin í Soffíubúð með en þau ásamt öðrum húsmunum eru gjöf frá Þorsteini Gylfasyni heitnum sem óskaði eftir því er hann var sextugur að í stað gjafa myndi fólk gefa húsmuni í Soffíubúð.

Að sögn Gunnars kveða reglur Háskóla Íslands á um lýðræði og því telji stúdentar að þeir megi taka þátt í ákvörðunum sem þessum sem skipta nemendur miklu máli. Jafnframt er ekki aðgengi fyrir fatlaða í kjallara aðalbyggingarinnar.

Síðan gerðist það í morgun að Guðmundur R. Jónsson, sviðastjóri HÍ kom að máli við nemendurna þar sem þau voru í setuverkfalli í Soffíubúð og sagði þeim að framkvæmdum hefði verið slegið á frest og ekkert yrði aðhafst fyrr en Ástráður kæmi til landsins.

Auk Soffíubúðar stendur til að  Kapelluloftið, sem er kaffistofa guðfræðinema, verði einnig lokað og þeir fái aðstöðu í kjallaranum ásamt heimspekinemum. Samkvæmt upplýsingum frá Guðmundi Birni Þorbjörnssyni, formanns félags guðfræðinema, stóðu guðfræðinemar við bakið á aðgerðum heimspekinema í morgun.