Icesave reikningur Landsbankans Retuers

Eftir Unu Sighvatsdóttur una@mbl.is

Fulltrúar hollenskra Icesave sparifjáreigenda sem funduðu með skilanefnd Landsbankans á landinu í síðustu viku hafa nú sent íslenskum þingmönnum opið bréf.

Í bréfinu er óskað eftir því að Alþingi gangist fyrir því að þeir 469 Hollendingar sem áttu yfir 100 þúsund evrur á Icesave reikningum fái féð greitt út sem fyrst. „Við erum sannfærð um að þetta sé framkvæmanlegt með lítilli fyrirhöfn með því að bæta upphæðinni við það lán sem þegar hefur verið samþykkt frá hollensku ríkisstjórninni, byggt á þeirri skuldbindingu að greiða fyrstu 20.870 evrur af hverri innistæðu,“ segir í bréfinu.

Gerard van Vliet, talsmaður hópsins, segist engin viðbrögð hafa fengið enn við tillögunni, en bréfið var sent þingmönnum á sunnudag. Hann segir að tap sparifjáreigendanna, alls um 40 milljónir evra, sé ekki há upphæð miðað við þá 1,3 milljarða evra sem Hollendingar ætli að lána Íslandi til að geta staðið við skuldbindingarnar, en hún muni hinsvegar afar miklu fyrir hvern einstakling.

Frumkvæði íslenskra stjórnvalda að slíku samkomulagi myndi skapa mikla velvild í Hollandi og sýna að Íslendingum stæði ekki á sama, að mati van Vliet.

Að frumkvæði van Vliet hefur verið komið á samkomulagi milli Viðskiptaráðs Íslands og Viðskiptaráðs Hollands um að stuðla að samvinnu milli íslenskra og hollenskra fyrirtækja og um verkefni sem geti vakið athygli á Íslandi sem áfangastað.

Finnur Oddsson framkvæmdastjóri Viðskiptaráðs staðfestir þetta. „Það er sameiginlegt hagsmunamál beggja að samskipti landanna séu með besta móti og þau má augljóslega styrkja á sviði viðskipta.“ Samstarfið er þó enn á byrjunarstigi.