Eigendur bankanna virðast hafa látið peningamarkaðssjóði kaupa í sínum eigin fyrirtækjum skömmu fyrir hrun bankanna, en selja í öðrum og traustari fyrirtækjum, að sögn Atla Gíslasonar, þingmanns Vinstri grænna. Skýringin sé sú að þeir voru komnir í lausafjárþröng. Þetta gerði að verkum að eigendur peningamarkaðssjóða bankanna töpuðu stórum fjárhæðum. Atli segist hafa fyrir þessu áreiðanlegar heimildir. Hann hafi kallað eftir upplýsingum um málið í viðskiptanefnd Alþingis en menn neiti að láta þær af hendi í skjóli bankaleyndar.

Þingnefndum sé ítrekað neitað um upplýsingar um bankana. Í raun fái þær engar upplýsingar sem máli skipti.

Eftir að ummæli Atla birtust höfðu forsvarsmenn Kaupþings samband við hann og buðu honum á fund, til að skoða viðkomandi upplýsingar. Atli kveðst munu gera grein fyrir þeim fundi síðar.

Stefán Héðinn Stefánsson hjá Landsbankanum segir ásakanir Atla hafa hljómað mjög undarlega. Bankinn vísi fullyrðingum hans alfarið á bug. Hann hafi reynt að hringja í Atla en ekki náð tali af honum. „Við erum undir eftirliti Fjármálaeftirlitsins og innri og ytri endurskoðunar, þar er farið yfir þessi mál. Þar er farið yfir mál sem eru tengd helstu eigendum bankanna og hafa margítrekað gert það,“ segir Stefán.

Sjóðirnir skráðir í Kauphöll

Glitnir sjóðir hf. sendu frá sér yfirlýsingu vegna málsins í gær. Fullyrðingar Atla eigi ekki við sjóði í rekstri Glitnis sjóða hf. Það sé rekstrarfélag verðbréfa- og fjárfestingarsjóða Glitnis, með sérstaka stjórn sem er óháð bankanum og eigendum hans. Sjóðirnir séu skráðir í Kauphöll Íslands og árshlutareikningar þeirra séu því opinberir.