mbl.is/Billi

Borgarráð hefur samþykkt að gengið verði til samninga við Alþjóðahús um eins árs þjónustusamning. Mannréttindaskrifstofu Reykjavíkurborgar hefur verið falið að sjá um samningsgerðina af hálfu Reykjavíkurborgar.

Reykjavíkurborg er meðal stofnaðila Alþjóðahúss og hefur veitt því fjárhagslegan stuðning frá árinu 2001. Borgarráð gerir ráð fyrir að fyrirhugaður þjónustusamningur taki við af núgildandi samningi Reykjavíkurborgar og Alþjóðahúss um næstu áramót.

Með samningnum vill Reykjavíkurborg styðja við öfluga starfsemi Alþjóðahúss og stuðla að því að íbúar nýti kosti fjölmenningarlegs samfélags þar sem jafnrétti og gagnkvæm virðing einkenna samskipti fólks af ólíkum uppruna.

Núgildandi samningur felur meðal annars í sér starfrækslu útibús Alþjóðahúss í Breiðholti, þar sem sérstök áhersla er lögð á þjónustu við barnafjölskyldur.

Óskar Bergsson, formaður borgarráðs, segir að sjaldan eða aldrei hafi verið jafn brýnt að styðja við starfsemi Alþjóðahúss og nú. „Reynsla annarra þjóða hefur því miður sýnt fram á  að erfiðleikar í efnahagslífi þjóða auka hættuna á neikvæðni gagnvart innflytjendum. Þess vegna er sérstaklega brýnt að styðja við þennan hóp og vekja athygli annarra borgarbúa á kostum og sóknarfærum fjölmenningarlegs samfélags í borginni.“