Höfuðstöðvar - Samvinnutryggingar voru löngum til húsa að Ármúla 3, þar sem Vátryggingafélags Íslands er nú. mbl.is/Árni Sæberg

eftir Magnús Halldórsson magnush@mbl.is

Skuldir Giftar fjárfestingarfélags, sem stofnað var utan um skuldbindingar Eignarhaldsfélags Samvinnutrygginga í júní í fyrra, nema á þriðja tug milljarða umfram virði eigna samkvæmt greinargerð sem stjórn Giftar sendi skilanefnd Samvinnutrygginga á þriðjudag.

Skilanefndin hefur unnið að slitum á Gift síðan ákvörðun um slitin var tekin á sumarmánuðum í fyrra. Þá var eigið fé félagsins um 30 milljarðar. Rúmlega 50 þúsund lögaðilar, einstaklingar og fyrirtæki, áttu að eignast hlutafé félagsins við slitin. Samvinnusjóðurinn var þar stærstur með milli 30 og 40 prósenta hlut. Ekkert er því til skiptanna eins og staða mála er nú, eins og áður hefur komið fram í Morgunblaðinu.

Stjórn félagsins leggur til í greinargerð sinni að beðið verði með ákvarðanir varðandi framtíð félagsins þar til „línur skýrist á fjármálamörkuðum“. Auk þess sé vert að bíða niðurstöðu í dómsmáli sem höfða á vegna yfirtöku breska fjármálaeftirlitsins á Kaupþingi í London sem leiddi til falls bankans.

Í greinargerðinni, sem Morgunblaðið hefur undir höndum, segir m.a.: „Staða félagsins er því með þeim hætti að skuldir umfram eignir skipta mörgum milljörðum. Í drögum að 6 mánaða uppgjöri samstæðu Giftar er eigið fé neikvætt um 1,7 milljarða. Í sama uppgjöri eru eignir í skráðum félögum rúmir 20 milljarðar. Stór hluti þeirra eigna er nú tapaður. Auk þess eru framvirkir samningar neikvæðir sem nemur milljörðum af sömu orsökum.“

Í greinargerðinni kemur einnig fram að Gift eigi rúman milljarð í peningum inni á reikningi í Kaupþingi. Gift keypti hlut í Kaupþingi í desember á síðasta ári fyrir um 20 milljarða króna. Bréfin voru keypt af bankanum en þau voru áður í eigu fjárfestingarfélagsins Gnúps.