mbl.is/Hafþór Hreiðarsson

Um hundrað manna liðsauki hefur verið kallaður út af höfuðborgarsvæðinu og Suðurlandinu til þess að aðstoða við leit að rjúpnaskyttu sem saknað hefur verið síðan í hádeginu. Að sögn Jóns Inga Sigvaldason, hjá Slysavarnarfélaginu Landsbjörgu, er leitarsvæðið erfitt yfirferðar með mikið af giljum auk þess sem fimbulkuldi er á svæðinu. 

Allar björgunarsveitir í Árnessýslu voru kallaðar út um miðjan dag í dag til að leita að manni við Skáldabúðir í Skeiða- og Gnúpverjahreppi.  Alls var það á sjötta tug manna sem leituðu með aðstoð spor- og víðavangshunda, auk þess sem þyrla Landhelgisgæslunnar til þátt í leitinni.

Mannsins hefur verið saknað frá því um hádegi. Hann fór á rjúpnaveiðar ásamt félögum sínum í morgun og höfðu þeir ráðgert að hittast í hádeginu. Þegar hann skilaði sér ekki kölluðu félagar hans eftir aðstoð.

Að sögn Jóns Inga Sigvaldason, hjá Slysavarnarfélaginu Landsbjörgu, er rjúpnaskyttan vel búinn og vön fjallaferðum. Jón Ingi tekur fram að vonir manna standi þó til þess að finna skyttuna sem fyrst þar sem mjög kalt sé að svæðinu.