Að sögn Slysavarnafélagsins Landsbjargar er stefnt að því að hefja leit að nýju upp úr kl. átta í fyrramálið.

Leit að rjúpnaskyttu, sem hefur verið saknað frá því í gær, hefur verið hætt í bili. Að sögn Jóns Inga Sigvaldasonar, hjá Slysavarnafélaginu Landsbjörgu, eru síðustu björgunarsveitarmennirnir að snúa aftur til byggða. Hann segir að stefnt sé að því að hefja leit á ný á níunda tímanum í fyrramálið.

„Þeir eru að senda seinustu sveitirnar til baka,“ sagði Jón Ingi þegar mbl.is náði tali af honum í kvöld.

Um 150 björgunarsveitarmenn úr um það bil 30 björgunarsveitum hafa leitað við Skáldabúðir í Skeiða- og Gnúpverjahreppi í dag. Þyrla Landhelgisgæslunnar aðstoðaði við leitina, en hún fór tvisvar yfir svæðið. Í seinna skiptið var hún í um tvo tíma á leitarsvæðinu. Hún sneri aftur til Reykjavíkur um fimmleytið. 

Björgunarsveitarmennirnir hafa notað fjórhjól og leitarhunda, en ekkert hefur sést til skyttunnar. Leitarsvæðið er stórt - um 80 ferkílómetrar - og erfitt yfirferðar.

Jón Ingi býst ekki við því að jafnmargir muni taka þátt í leitinni á morgun.

Leitað hefur verið að manninum í allan dag.