.

Eftir Helga Bjarnason og Jón Pétur Jónsson

 Víðtæk leit að rjúpnaskyttu á Skáldabúðaheiði í fyrrverandi Gnúpverjahreppi í Árnessýslu hefur ekki borið árangur. Leitað var frá því um miðjan dag á laugardag og fram á kvöld í gær. Leit hefst að nýju með birtingu í dag.

Maður um sjötugt fór til rjúpnaveiða með tveimur félögum á Skáldabúðaheiði um klukkan 10 á laugardagsmorgunn. Þeir ætluðu að hittast aftur tveimur tímum síðar við bíl sinn undir fjallinu. Þegar maðurinn kom ekki til baka fóru félagar hans að svipast um eftir honum og létu síðan lögreglu vita.

Björgunarsveitir voru kallaðar út um miðjan dag og leituðu fram undir morgun. Í gær voru síðan um 150 menn úr um 30 björgunarsveitum af öllu Suðvesturlandi við leit. Reynt var að nota hunda og leitað úr þyrlu Landhelgisgæslunnar.

Leitarsvæðið er stórt og ógreiðfært. Þó tókst að fara nokkuð vel yfir það. Engar vísbendingar fundust um ferðir rjúpnaskyttunnar. Að sögn Jóns Inga Sigvaldasonar hjá Landsbjörgu nær leitarsvæðið í grófum dráttum yfir landsvæðið frá Stóru-Laxá að þjóðveginum um Þjórsárdal.

Maðurinn sem leitað er að er nokkuð vel búinn, að sögn Jóns Inga, og vanur fjallaferðum.

Kalt var á fjöllum í gær en bjart veður. Í gærkvöldi byrjaði að snjóa.

Ekki lá fyrir í gærkvöldi hversu margir færu til leitar í dag.