mbl.is/Friðrik

Eftir Magnús Halldórsson magnush@mbl.is

Hanna Birna Kristjánsdóttir, borgarstjóri í Reykjavík, sagði frá því í ræðu á fjármálaráðstefnu sveitarfélaga 13. nóvember síðastliðinn að stærsta verkefni sveitarfélaga í landinu væri nú, eftir hrun fjármálakerfisins, að verja grunnþjónustu. Allt annað væri aftar í forgangsröðinni.

Sú vörn verður ekki sársaukalaus, ef marka má þau atriði sem stjórnvöld og fulltrúar Sambands íslenskra sveitarfélaga ræða nú um til þess að mæta erfiðleikum sem fylgdu í kjölfar hruns fjármálakerfisins.

Samkvæmt drögum að fjárlögum fyrir árið 2009 er ekki gert ráð fyrir 1.400 milljóna króna viðbótarframlagi úr jöfnunarsjóði til sveitarfélaga sem þurfa á því að halda. Verði það að veruleika, segir Halldór Halldórsson, formaður Sambands íslenskra sveitarfélaga: „Það eru mörg sveitarfélög, sérstaklega þau sem minni eru, sem ekki hafa efni á því að missa aukaframlagið. Það er aðeins hægt að mæta því með því að fella niður þjónustu sem þau þurfa að sinna samkvæmt lögum. Það gengur ekki. Það gefur augaleið,“ sagði Halldór í samtali við Morgunblaðið í gær.