Upp á síðkastið hefur litháska fyrirtækið Adakris, sem byggir Sæmundarskóla í Grafarholti, viljað ráða íslenska iðnaðarmenn í auknum mæli til starfa. Ástæða þessa er sú að dýrt er orðið að flytja inn erlent vinnuafl sem fær laun í erlendum gjaldmiðli og því þykir hagkvæmara að ráða íslenskt starfsfólk. Þegar boðið var í verkið í sumar var erfitt að fá Íslendinga í vinnu, en nú er framboðið meira en eftirspurnin.

Einar Matthíasson, byggingarstjóri í Sæmundarskóla, segist reikna með að um áramót haldi flokkur litháskra starfsmanna heim á leið, en við taki alfarið íslenskir starfsmenn. Hann reiknar með að í janúar verði þeir um 20 talsins, en þegar komið verði fram í marsmánuð verði þar yfir 50 Íslendingar að störfum, í öllum greinum.

Samningur borgarinnar við Adakris í haust um byggingu Sæmundarskóla var umdeildur. Kostnaðaráætlun við bygginguna var 1,35 milljarðar, en Adakris bauð 1,16 milljarða eða 86,2% af kostnaðaráætlun. Ris átti næstlægsta tilboðið sem var 30 milljónum króna hærra.

„Þetta er stór vinnustaður í Sæmundarskóla og skiptir miklu máli að íslenskir iðnaðarmenn fái störf þarna,“ segir Baldur Baldvinsson, framkvæmdastjóri Sambands byggingarmanna.