Merki Samtaka í ferðaþjónustu.

Mikill meirihluti félagsmanna Samtaka ferðaþjónustunnar (SAF) vilja taka upp evru, eða 83% aðspurðra. Þá vilja 77% félagsmanna hefja aðildarviðræður við Evrópusambandið. Þetta er á meðal niðurstaðna könnunar sem samtökin létu gera um viðhorf félagsmanna til Evrópumála.

Spurt er: „Ertu hlynnt/ur eða andvíg/ur því að evra verði tekin upp sem gjaldmiðill á Íslandi í stað íslensku krónunnar?“ 55% svarenda sögðust vera mjög hlynntir og 28% sögðust vera frekar hlynntir.

Þá kemur fram að 71% félagsmanna telji aðild að ESB frekar hagstæða eða mjög hagstæða fyrir ferðaþjónustuna. Auk þes séu 64% félagsmanna hlynnt eða frekar hlynnt aðild að Evrópusambandinu.

Fram kemur í tilkynningu frá SAF að ljóst sé að mikill meirihluti vilji taka upp evru. Þá segir ennfremur að samtökin hafi í mörg ár sent frá sér ályktanir um að fyrirtækin í ferðaþjónustu geti ekki búið við miklar gengissveiflur sem hafi haft mikil og neikvæð áhrif á afkomu greinarinnar. Fyrirtækin verðleggi þjónustu sína langt fram í tímann og vita lítið hvað fæst á endanum greitt fyrir selda þjónustu.

Enn fremur sé mikill meirihluti félagsmanna, 77%,  hlynntur því að teknar verði upp aðildarviðræður við ESB eða heldur fleiri en þeir sem eru hlynntir eða frekar hlynntir aðild að ESB án nokkurra fyrirvara.
 
Í Samtökum ferðaþjónustunnar eru margar tegundir fyrirtækja og býsna mikill munur á afstöðu einstakra greina hvað varðar aðild að ESB.  Mun minni munur er á afstöðunni til upptöku evru.

Úrtakið voru alllir félagsmenn í félagatali SAF - alls 277 fyrirtæki (allt þýðið).

Alls svöruðu 152 könnuninn, og er svarhlutfallið 55%.