Samninganefndir sjómanna og útvegsmanna munu á mánudaginn taka upp þráðinn þar sem frá var horfið fyrir hálfum mánuði við gerð nýrra samninga. Stefnt er að stífum fundarhöldum í næstu viku með það að markmiði að ná samningum.

Kjarasamningar Sjómannasambands Íslands, Farmanna- og fiskimannasambands Íslands, Félags vélstjóra og málmtæknimanna og fleiri samtaka við Landssamband íslenskra útvegsmanna hafa verið lausir frá því í lok maí. Samtökin semja fyrir um 3500 sjómenn.

Kröfur útvegsmanna um aukna þátttöku sjómanna í olíukostnaði og breytingar á áhafnatryggingu virðast helsti ásteytingarsteinninn í samningunum. „Við erum ekki að fara fram á meira en aðrir hafa fengið en það búa engir við viðlíka kröfur frá sínum viðsemjendum og við,“ sagði Sævar Gunnarsson, formaður Sjómannasambands Íslands.

Friðrik J. Arngrímsson, framkvæmdastjóri LÍÚ, segir að þótt olíuverð hafi lækkað sé það enn langt umfram það sem miðað hafi verið við í kjarasamningum. Forystumenn viðsemjenda eru ekki svartsýnir á samninga. „Við ætlum að taka törn í næstu viku og sjá hvað við komumst áfram með málið,“ segir Friðrik.