Unnið er að því í dómsmálaráðuneytinu að auðvelda einstaklingum sem ekki hafa stundað atvinnurekstur að leita nauðasamninga. Þetta kemur fram í svari Björns Bjarnasonar, dómsmálaráðherra við fyrirspurn Jóns Bjarnasonar, þingmanns VG.

Þingmaðurinn spurði dómsmálaráðherra hvort uppi væru áform af hálfu stjórnvalda til þess að rýmka skilyrði gjaldþrotalaga um gjaldþrotaskipti, greiðslustöðvun og nauðasamninga. Dómsmálaráðherra sagði að unnið væri að breytingum á 3. þætti gjaldþrotaskiptalaga um nauðasamninga án undanfarandi gjaldþrotaskipta með það að markmiði að einfalda málsmeðferðina og auðvelda einstaklingum sem ekki hafa stundað atvinnurekstur að leita nauðasamninga.

Í svari ráðherra segir ennfremur að ekki séu áformaðar sérstakar aðgerðir af hálfu stjórnvalda til að fresta gjaldþrotaskiptaferli gagnvart einstaklingum og fyrirtækjum um ákveðinn tíma vegna sérstakra aðstæðna á vinnu- og fjármálamarkaði.

Þá sagði dómsmálaráðherra skiptastjórum heimilt, samkvæmt núgildandi lögum um gjaldþrotaskipti, að fresta ráðstöfun eigna úr þrotabúi, telji hann það hagkvæmara eða þjóna betur hagsmunum lánardrottna og að þrotabúið muni þá bera meira út býtum fjárhagslega.

Loks upplýsti Björn Bjarnason, dómsmálaráðherra að unnið hefði verið að breytingum á gjaldþrotaskiptalögum með það að markmiði að frumvarp verði lagt fyrir Alþingi nú í desember.