Örbirgð fer vaxandi og leita sífellt fleiri aðstoðar hjálparsamtaka.

Getur þú tekið fjölskyldu í fóstur? Ef svarið er Já, hafðu þá samband við Fjölskylduhjálp Íslands.

Ásgerður Jóna Flosadóttir, formaður Fjölskylduhjálpar Íslands segir að töluvert margir hafi spurt hvort hægt væri að koma stuðningi beint til þeirra sem á þurfa að halda og því hafi verið ákveðið að hrinda hugmyndinni í framkvæmd.

„Verkefnið Fjölskyldur í fóstur er þannig að viðkomandi aðili tekur að sér að styðja, til dæmis einstæða móður með barn, og aðstoðin beinist frá einum aðila til annars fyrir milligöngu Fjölskylduhjálpar Íslands,“ segir Ásgerður Jóna Flosadóttir.

Eitt helsta markmiðið með verkefninu er að beintengja aðstoð sem aftur kann að nýtast til fleiri þátta en einungis mataraðstoðar. Jafnframt eins og önnur aðstoð að styðja fólk í fjárhagsörðugleikum gegnum erfiðleika til sjálfshjálpar.

Um tímabundna aðstoð getur verið að ræða. Ásgerður Jóna segir að mögulega minnki þetta verkefni álag á hjálparsamtök.

Hún segir að Fjölskylduhjálpin muni aðstoða við að koma á sambandi milli þess sem vill styðja og þess sem þarf á aðstoð að halda. Verkefninu verði fylgt eftir og fylgst með framgangi í hverju tilviki fyrir sig.

Áhugasömum er bent á að hafa samband á netfangið dalros@islandia.is eða í síma 892-9603.