Útifundur vegna alþjóðlegs átaks gegn ofbeldi
Börn úr Oddeyrarskóla syngja á útifundinum á Ráðhústorgi í dag. mbl.is/Skapti
Fundur fór fram undir kvöld á Ráðhústorginu á Akureyri, í tilefni 16 daga alþjóðlegs átaks gegn kynbundnu ofbeldi. Átakið er í ár tileinkað mannréttindayfirlýsingunni og aðgerðum til að tryggja konum þau réttindi sem hún kveður á um.
Átakið hófst 25. nóvember, en16 daga átak gegn kynbundu ofbeldi er nú haldið í 18. sinn og hefur allan þann tíma unnið að því að draga kynbundið ofbeldi fram í dagsljósið sem mannréttindabrot. Hópar og samtök um allan heim hafa nýtt átakið til að krefjast aðstoðar og stuðnings til handa þolendum ofbeldis, til að styrkja forvarnastarf og þrýsta á um breytingar á löggjöf til að bæta réttarstöðu þolenda. Þá hefur átakið verið nýtt til að stuðla að því alþjóðlegum mannréttindareglum sé beitt til að vinna gegn kynbundu ofbeldi sem mannréttindabroti, heilbrigðisvandamáli og ógn við mannfrelsi og frið um allan heim, skv upplýsingum Jafnréttisstofu.
Alþjóðleg mannréttindavernd og réttindi kvenna eiga undir högg að sækja og því er 16 daga átak árið 2008 tileinkað mannréttindayfirlýsingunni og aðgerðum til að tryggja konum þau réttindi sem hún kveður á um. Á Íslandi er sjónum sérstaklega beint að því að standa vörð um mannhelgi og mannréttindi kvenna í efnahagskreppunni.
„Yfirskrift átaksins í ár 2008 er Mannréttindi kvenna eru ekki munaður!, til að leggja áherslu á að opinberar aðgerðir til að vernda mannréttindi kvenna eru ekki munaður sem kasta má fyrir róða þegar skórinn kreppir. Margt hefur áunnist undanfarin ár í baráttu gegn kynbundnu ofbeldi; íslensk stjórnvöld hafa gert ítarlega aðgerðaáætlun gegn ofbeldi á heimilum og kynferðisofbeldi og aðgerðaáætlun gegn mansali er í smíðum. Brýnt er að fyrirhugaður niðurskurður hins opinbera bitni ekki á framkvæmd þessara áætlana því vitað er að efnahagsþrengingar geta leitt til aukins kynbundins ofbeldis og bitna oft harðar á konum,“ segir í tilkynningu frá Jafnréttisstofu.
Meðal dagskráratriða á útifundinum á Ráðhústorgi í dag voru stutt ávörp, ljóðalestur og söngur Barnakórs Tónlistaskólans, Karlakórs Akureyrar og nemenda í 8. bekk í Oddeyrarskóla, auk þess sem kveikt var á kertum fyrir þolendur kynbundins ofbeldis.
Þeir sem stóðu að að útifundinum voru Samfélags- og mannréttindaráð Akureyrarbæjar, Jafnréttisstofa, Aflið – systursamtök Stígamóta, Zontaklúbburinn Þórunn Hyrna, Zontaklúbbur Akureyrar, Menntasmiðja kvenna, UNIFEM á Íslandi, Norðurlandsdeild Ljósmæðrafélags Íslands og Norðurlandsdeild Hjúkrunarfélags Íslands.
