Heilbrigðisráðherra kom á fót vinnuhópi fyrir stuttu sem fékk það hlutverk að setja fram tillögur og kanna ma. möguleika á öflugra samstarfi sjúkrahúsa við útboð, innkaup og pökkun lyfja.

Markmið ráðherra er að ná fram aukinni hagkvæmni í lyfjainnkaupum í heilbrigðisþjónustunni. Þær stofnanir sem fyrst og fremst er rætt um í þessu sambandi eru heilbrigðisstofnanir víðs vegar um landið, heilsugæslustöðvar um land allt og síðast en ekki síst öldrunar- og hjúkrunarstofnanir.

Landspítalinn býður sjálfur út lyf stærðar sinnar vegna, en spítalinn kaupir inn og býður út lyf, lækningatæki- og vörur fyrir rúmlega sjö milljarða króna á þessu ári.

Vinnuhópurinn sem ráðherra skipaði skilaði nýverið fyrstu hugmyndum sínum. Til að hrinda hugmyndum hans í framkvæmd er lagt til að sett verði á laggirnar samstarfsnefnd heilbrigðisstofnana.

Lauslegt hagkvæmnismat bendir til að draga megi úr kostnaði sem nemur rúmlega 150 milljónum króna árlega með sameiginlegum innkaupum og útboðum lyfja.