Tæki og tól í fíkniefnaverksmiðjunni. mbl.is

Lögreglan á höfuðborgarsvæðinu segir rannsókn á amfetamínverksmiðju, sem fannst í Hafnarfirði í október, ganga vel. Lagt var hald á ýmsan búnað, sem tengdist framleiðslunni, svo sem frystikistur, rafmagnsviftur, suðutæki, hrærivélar, hitastýringartæki, grammavogir, blandara, bakarofn með hellum, stáltunnur og ýmsan sérhæfðan glerbúnað.

Þrír karlmenn sátu um tíma í gæsluvarðhaldi vegna rannsóknar málsins en tveir þeirra afplána nú dóma vegna annarra mála og sá þriðji er laus úr haldi. Mennirnir voru handteknir 16. október sl. en sama dag voru gerðar húsleitir á tveimur stöðum í iðnaðarhverfi í Hafnarfirði. Á báðum stöðunum fannst búnaður sem tengist umræddri starfsemi og var hann haldlagður.

Við húsleitirnar tók lögreglan líka í sína vörslu um 18,2 kg af hassi og tæplega 700 grömm af amfetamíni. Jafnframt var lagt hald á liðlega 3500 millilítra af BMK, sem er þekkt upphafsefni og/eða milliefni í framleiðslu amfetamíns eða metamfetamíns, og 38 kg af P-2-NP sem er efni sem er notað í sama tilgangi.