eftir Silju Björk Huldudóttur silja@mbl.is

Fyrsta jólaúthlutun Fjölskylduhjálpar Íslands (FÍ) fór fram í húskynnum félagsins í gær. Að sögn Ásgerðar Jónu Flosadóttur, formanns FÍ, verður alls úthlutað þrisvar sinnum í þessum mánuði og geta um 200 fjölskyldur þegið aðstoð í hvert skipti. Næst verður úthlutað 17. og 19. desember.

Meðal þess sem verið er að gefa er matur á borð við kjöt, kaffi, hveiti, mjólkurvörur, ost og ís, mandarínur, epli, jólakonfekt og gos. Einnig geta þeir sem leita til FÍ fengið jólagjafir fyrir börn ásamt innpökkunarpappír og sparifötum.

Aðspurð segist Ásgerður finna mikinn mun milli ára í ásókn eftir aðstoð Fjölskylduhjálparinnar. Segist hún sjá mikið af nýjum andlitum, þannig hafi fjölgað mikið í hópi eldri borgara sem og í yngri aldurshópum, en þar sé margt fólk sem misst hafi vinnuna á haustmánuðum.

„Því miður virðist upplýsingagjöf til fólks ekki vera nægilega öflug því margir þeirra sem leita til okkar eru í öngum sínum og hafa alls ekki vitað hvert þeir áttu að leita sér aðstoðar,“ segir Ásgerður og tekur fram að í ófáum símtölum séu viðmælendur hennar hágrátandi.

Aðspurð hvernig Fjölskylduaðstoðin fjármagni aðstoð sína segir Ásgerður Jóna fjölda fyrirtækja og velviljaðra einstaklinga leggja Fjölskylduhjálpinni lið, auk þess sem Fjölskylduhjálpin njóti góðra kjara þegar hún kaupir inn mat handa skjólstæðingum sínum. Ásgerður minnir á að allir starfsmenn Fjölskylduhjálparinnar gefi vinnu enda um sjálfboðastarf að ræða.