Úr Síldarvinnslunni á Norðfirði.

Eftir Helga Bjarnason helgi@mbl.is

Ef ekki verður hægt að frysta síld það sem eftir er af vertíðinni verður útflutningsverðmæti síldarafurða á vertíðinni 2,5 milljörðum króna minna en annars hefði orðið. Frystihúsin láta meta hvern farm fyrir löndun en svo mikill hluti aflans er sýktur að ekki er talinn grundvöllur fyrir frystingu. Aflinn er því bræddur í mjöl og lýsi.

Sjómenn hafa verið að leita fyrir sér víða en sníkjudýrið virðist vera í allri síld, jafnt smárri sem stórri. Tvö skip voru í gær við leit í Ísafjarðardjúpi og Jökulfjörðum en köstuðu ekki því skipstjórarnir töldu flekki við botn „smásíldarlega“. Mesta veiðin hefur áfram verið á Breiðafirði.

Í gær nam heildarafli af íslensku sumargotsíldinni liðlega 105 þúsund tonnum af tæplega 150 þúsund tonna kvóta. Sumar útgerðir eru að ljúka við kvóta sinn á meðan aðrar eiga mikið eftir.

Útflutningsverðmæti síldarafurða á vertíðinni var áætlað 14-16 milljarðar króna og var í þeim tölum reiknað með frystingu á stórum hluta kvótans. Náist ekki að hefja frystingu á nýjan leik, sem Friðrik J. Arngrímsson, framkvæmdastjóri Landssambands íslenskra útvegsmanna, telur þó að ætti að vera hægt, minnka verðmætin um nærri hálfan þriðja milljarð kr.

Ef 30-40% hrygningarstofnsins drepast vegna sýkingarinnar, eins og fyrstu athuganir benda til, samsvarar það því að kvóti einnar og hálfrar síldarvertíðar fari forgörðum í vetur. Útflutningsverðmæti þess afla gæti numið 20-25 milljörðum kr. Málið lítur enn verr út því sýkin gæti verið lengur í stofninum. Þá virðist hún ekki síður leggjast á ungsíld. Friðrik óttast að stofninn verði mörg ár að ná sér.