mbl.is/Július

Talsverður erill hefur verið hjá lögreglunni á Suðurnesjum í dag, m.a. vegna veðurs og færðar, en einnig vegna ölvunar og óláta miðað við það sem fram kemur í dagbók lögreglunnar.

Í nótt lenti ökumaður utan vegar eftir að hann missti stjórn á bílnum vegna hálku innanbæjar í Reykjanesbæ. Hann meiddist ekki en hinsvegar þurfti að draga bifreiðina burt með kranabíl.

Snemma í morgun eða um áttaleytið var síðan tilkynnt um nokkra menn sem létu ófriðlega á Tjarnargötu í Keflavík. Voru þar samankomnir nokkrir ölvaðir og æstir menn og var einn þeirra handtekinn. Hann fékk að gista í fangaklefa þar til áfengisvíman rann af honum.

Þá þurfti lögreglan að fara í heimahús í Reykjanesbæ vegna ölvunar og óláta. Var þar fyrir drukkinn maður sem hafði ráðist á annan mann í húsinu og veitt honum áverka. Maðurinn veittist að lögreglu þegar hún kom á staðinn og gekk illa að róa hann. Hann var handtekinn og vistaður í fangahúsi.

Einn ökumaður var stöðvaður grunaður um akstur undir áhrifum fíkniefna. Eftir skýrslu- og blóðsýnatöku var ökumaðurinn frjáls ferða sinna. Síðdegis um kl.16 valt síðan bifreið á hliðina inni í íbúðarhverfi á Vallarheiði. Slysið reyndist sem betur fer ekki alvarlegt, en ungbarn var inni í bifreiðinni, í góðum bílstól og meiddist ekki.