Börnin höfðu gaman af skemmtiatriðunum. mbl.is/Kristinn

200-300 manns mættu á jólaball á Ingólfstorgi á fimmta tímanum í dag. Ómar Ragnarsson, Helga Möller og Magnús Kjartansson stjórnuðu þar jólaskemmtun með söng og dansi. Margt var þar að sjá og heyra fyrir yngri kynslóðina, en jólasveinar og jólaálfur litu við, Grýla sýndi einnig á sér andlitið, en betur fór en á horfðist. Grýla reyndist nokkuð viðmótsbetri en sögur hafa farið af. Á ballinu var safnað fé til hjálpar þeim sem þurfa aðstoð um jólin.

Ölgerðin stóð fyrir styrktarsöfnun sem fór þannig fram að hvítölsbrúsar voru seldir á 500 krónur stykkið, en söluandvirðið var látið renna til Hjálparstarfs kirkjunnar. Þetta var sagt í stíl við þá stemningu sem myndaðist í gamla daga þegar menn stóðu í röðum í porti Ölgerðarinnar og fengu hvítöl fyrir jólin.