Frá húsnæði Tryggingastofnunar. mbl.is/Árni Torfason

Óhætt er að helminga þá tölu sem nefnd var á Alþingi í dag, 240 milljónir, sem kostnað við Sjúkratryggingar Íslands að sögn forstjóra stofnunarinnar, Steingríms Ara Arasonar. Milljónirnar 240 séu teknar úr skýrslu sem lögð var fram í upphafi um mesta hugsanlega kostnað við stofnunina.

„Það liggur fyrir skýrsla þar sem þessi tala er nefnd og þá er dæminu stillt þannig upp að ef Tryggingastofnun væri skipt upp í tvær alveg sjálfstæðar stofnanir sem hefðu ekkert samstarf á einu eða neinu sviði, þá mætti gera ráð fyrir að kostnaðurinn yrði 240 milljónir á ári“ segir Steingrímur Ari. Rekstraráætlunin nú sé hinsvegar með öðrum hætti. „Núna liggur alveg ljóst fyrir að menn sjá hagkvæmni í því að hafa ákveðna hluti í samrekstri og þar með er hægt að ná þessari tölu umtalsvert niður og það er okkur uppálagt.“

Steingrímur segir að þó þessi tala hafi í upphafi verið nefnd hafi það verið alveg ljóst frá upphafi að með samstarfi milli Tryggingastofnunnar og hinnar nýju stofnunar Sjúkratrygginga Íslands mætti lækka þessa tölu verulega og að því hafi verið stefnt. „Við erum með samliggjandi húsnæði og það eitt og sér gefur kost á samstarfi. En síðan er líka vilji til þess að vera með ákveðna þætti þar fyrir utan í samrekstri eins og sameiginlega þjónustumiðstöð og samrekstur á tölvukerfi og öðru.“

Óhjákvæmilegt en jafnframt eftirsóknarvert

Þótt endanleg tala liggi ekki fyrir, enda fjárlög ekki fullsmíðuð, segir Steingrímur þó óhætt að helminga milljónirnar 240. „Menn hafa verið að ganga út frá bilinu 100-140 milljónir, þó að auðvitað séu ákveðin vikmörk.“ Hann bendir á að sem þessari hljóti alltaf að fylgja einhver viðbótarkostnaður, það sé óhjákvæmilegt en jafnframt eftirsóknarvert.

„Með því að hafa tvær stofnanir, tvo forstjóra í staðinn fyrir einn, tvær stjórnir og svo framvegis, þá eru menn auðvitað að gefa hvorum málaflokknum fyrir sig meira vægi. Auðvitað er lagt í þennan kostnað til að styrkja starfsemina og efla þjónustuhlutverk beggja stofnana, þannig að það er ekki eins og þetta sé tapað fé.“

Þá segir Benedikt Jóhannesson, stjórnarformaður Sjúkratrygginga Íslands, að ekki standi til að aðskilja upplýsingakerfi stofnananna tveggja. Sigríður Lillý Baldursdóttir, forstjóri Tryggingastofnunar ríkisins, sagði við MBL sjónvarp í dag að kostnaður við það myndi hlaupa á hundruðum milljóna til viðbótar. „Það er í sjálfu sér alveg rétt, en það bara er ekki til umræðu að aðskilja tölvukerfin og stendur ekki til. En ég er viss um að svo væri þá er rétt að það myndi eflaust kosta mjög mikið,“ segir Benedikt. Hann bendir auk þess á að hluta af kostnaði við Sjúkratryggingar Íslands hafi áður verið við Tryggingastofnun, það sé því ekki viðbótarkostnaður heldur færist hann einfaldlega til milli stofnana.