Fólk skráir sig á atvinnuleysisskrá í Bandaríkjunum

Eftir Ágúst Inga Jónsson og Magnús Halldórsson

Gert er ráð fyrir að 17,5 milljarðar króna verði greiddir úr Atvinnuleysistryggingasjóði á næsta ári, í endurskoðuðu fjárlagafrumvarpi. Einnig er lagt til að framlag til Ábyrgðasjóðs launa vegna gjaldþrota verði 1.800 milljónir á árinu 2009.

„Á næsta ári gerum við ráð fyrir að þessi upphæð nánast tvöfaldist og verði um 1.800 milljónir,“ segir Sigurður P. Sigmundsson, sviðsstjóri rekstrarsviðs Vinnumálastofnunar. „Þarna er um sprengingu að ræða hvað varðar greiðslur úr Ábyrgðasjóðnum og margar greinar atvinnulífsins eru orðnar veikburða. Ég er ekki aðeins að tala um byggingariðnaðinn, því gjaldþrot hafa t.d. aukist í þjónustugreinum og nú hafa jafnvel fasteignasölur komið inn á borð Ábyrgðasjóðsins,“ segir Sigurður.

Hann segir að áætlun um 5,7% atvinnuleysi á næsta ári sé varfærnisleg.

„Eins og staðan er núna bendir allt til að meðalatvinnuleysi í desember verði 4,5% og hjá Vinnumálastofnun höfum við talað um að í lok janúar gæti atvinnuleysið verið orðið um 6% og allt að 7% í lok febrúar.“

Í gær voru 8.935 manns á atvinnuleysisskrá samkvæmt tölum frá Vinnumálastofnun, sem samsvarar um 5,4% atvinnuleysi. 5.575 karlar eru án atvinnu, en 3.360 konur. Þeim sem eru án atvinnu hefur því fjölgað hratt frá því í október. Sérstaklega hafa margir starfsmenn í byggingariðnaði misst vinnuna, en aðrar stéttir hafa líka orðið fyrir áföllum.

Jóhanna Harpa Árnadóttir, formaður Verkfræðingafélags Íslands, segir verkfræðinga vera farna að horfa út fyrir landsteinana, nú þegar tugir eða hundruð þeirra hafa fengið uppsagnarbréf. Margir þeirra séu eftirsóttir af erlendum fyrirtækjum.