Reynir Traustason, ritstjóri DV, sagði í samtali við Jón Bjarka Magnússon, þá blaðamann á DV, að því hefði verið hótað að stöðva prentun blaðsins. Í hljóðritun sem Jón Bjarki gerði og var leikin í Kastljósi í fyrrakvöld sagði Reynir, samkvæmt eftirriti af samtalinu: „...ég meina þetta er þannig land að það var hótað að loka, það var hótað að stöðva prentun DV.“

DV er prentað í Landsprenti, prentsmiðju í eigu Árvakurs hf. Guðbrandur Magnússon, framkvæmdastjóri Landsprents, segir að Landsprent hafi ekki beitt hótunum um að hætta að prenta DV, né heldur orðið fyrir utanaðkomandi þrýstingi um að gera það. „En það er réttast að framkvæmdastjóri Birtíngs svari þessum ásökunum. Ég tel ekki við hæfi að upplýsa um stöðu einstakra viðskiptavina í fjölmiðlum,“ sagði Guðbrandur.

Elín G. Ragnarsdóttir, framkvæmdastjóri Birtíngs útgáfufélags, sem m.a. gefur út DV, kvaðst ekki geta brotið viðskiptatrúnað varðandi viðskiptin við Landsprent.

Samstarfið er gott

„En við höfum átt í góðu samstarfi við Guðbrand [framkvæmdastjóra Landsprents] og Landsprent og Árvakur. Auðvitað höfum við tekist á, prúttað um verð og annað, en almennt og yfirleitt ber ég þeim vel söguna,“ sagði Elín.