Kristín Ingólfsdóttir, rektor Háskóla Íslands, skrifaði í síðustu viku undir samning við Peking háskóla í Kína um gagnkvæmt samstarf háskólanna um rannsóknir og kennara- og nemendaskipti. 

Fram kemur í fréttatilkynningu frá Háskóla Íslands, að Peking háskóli sé flaggskip kínverskra háskóla og þeirra kröfuharðastur varðandi inntöku stúdenta. Við útfærslu samstarfssamningsins sé því tryggt að við stúdentaskipti koma eingöngu afburðanemendur til Háskóla Íslands og jafnframt er nemendum sem fara frá HÍ tryggð afburðakennsla og aðbúnaður.   

Einnig kemur fram í tilkynningunni að Kristín hafi verið í Kína í boði kínverskra menntayfirvalda og að henni hafi verið boðið að sækja ráðstefnu með rektorum annarra háskóla þar sem svokallaðar Konfúsíusarstofnanir séu starfræktar.  

Í heimsókn Kristínar var jafnframt undirritaður samstarfssamningur við Háskóla erlendra fræða í Beijing (Beijing Foreign Studies University), þar sem íslenska er kennd.  Einnig voru lögð drög að samningi við hinn virta Renmin háskóla, sem einkum starfar á sviðum hug- og félagsvísinda.