mbl.is/Brynjar Gauti

Hæstiréttur hefur dæmt erlendan karlmann í þriggja mánaða fangelsi fyrir að hafa ráðist með ofbeldi á lögreglumenn við fíkniefnadeild lögreglustjórans á höfuðborgarsvæðinu á Laugavegi í janúar sl. Hæstiréttur þyngdi dóm Héraðsdóms Reykjavíkur sem hafði dæmt manninn í tveggja mánaða fangelsi.

Fram kemur í dómi Hæstaréttar að frá refsingunni dragist gæsluvarðahaldsvist hans frá 11. til 18 janúar sl. Héraðsdómur skal að öðru leyti óraskaður.

Ríkissaksóknari höfðaði mál með ákæru 5. febrúar sl. á hendur þremur mönnum fyrir brot gegn valdstjórninni. Tveir þeirra voru sýknaðir í Héraðsdómi Reykjavíkur. 

Mönnunum var gefið að sök að hafa aðfaranótt föstudagsins 11. janúar sl. brotið gegn almennum hegningarlögum með því að ráðast með ofbeldi á lögreglumenn við fíkniefnadeild lögreglustjórans á höfuðborgarsvæðinu, sem voru við skyldustörf fyrir utan veitingastað á Laugavegi í Reykjavík.

Manninum, sem var sakfelldur, var m.a. gefið að sök að hafa slegið tvo lögreglumenn með krepptum hnefa í höfuðið með þeim afleiðingum að þeir hlutu áverka á andliti.