Ritstjórar Fréttablaðsins, Þorsteinn Pálsson og Jón Kaldal, og 365 miðlar voru í Héraðsdómi Reykjavíkur í dag sýknaðir af meiðyrðakæru sem Hjalti Árnason höfðaði gegn þeim. Krafðist Hjalti þess að ummæli sem birtust í Fréttablaðinu á síðasta ári yrðu dæmd dauð og ómerk og að fá greiddar 10 milljónir króna í miskabætur.

Hjalti krafðist þess að  eftirfarandi ummæli sem birtust í Fréttablaðinu 8. október 2007 verði dæmd dauð og ómerk. ,,Kraftlyftingamenn sem vilja ekki lyfjapróf þröngvuðu formanni sínum frá völdum.“

,,Ekki hafi verið vilji fyrir því meðal áhrifamanna í sambandinu vegna þess að því myndu fylgja regluleg lyfjapróf“

,,...í raun eru tveir menn sem stjórna eiginlega öllu. Þar á hún við þá Auðun Jónsson og Hjalta Úrsus Árnason, en hvorugur þeirra situr í stjórn sambandsins.“

Í umdeildri frétt kemur fram að Jóhanna Eiríksdóttir hafi viljað að kraftlyftingamenn sæktust eftir aðild að Íþrótta og Ólympíusambandi Íslands, en ekki hafi verið vilji fyrir því meðal áhrifamanna í sambandinu vegna þess að því myndu fylgja regluleg lyfjapróf. Í beinu framhaldi segir í fréttinni að stjórnin hafi ekki fylgt formanninum að málum og þá hafi skipstjórinn ekkert að gera í brúnni lengur. Jafnframt segir í beinu framhaldi, innan tilvitnunarmerkja: Þeir eru ekki mikið fyrir breytingar þarna og í raun eru tveir menn sem stjórna eiginlega öllu“. Þá segir í beinu framhaldi að þar eigi Jóhanna við þá Auðun Jónsson og Hjalta Úrsus Árnason en hvorugur þeirra sitji í stjórn sambandsins.

Segir í niðurstöðu héraðsdóms að óumdeilt sé að Hjalti er þekktur kraftlyftingamaður. „Í fréttinni sjálfri er ekki greint frá því að stefnandi hafi verið á þeim fundi sem fréttin greinir frá, en við meðferð málsins kom það fram. Þótt stefnandi sé nafnkunnur kraftlyftingamaður og hafi verið á fundi þeim sem greint er frá í fréttinni, beinast hvorug ofangreindra ummæla sérstaklega að honum, heldur að ótilgreindum hópi kraftlyftingamanna sem voru á fundi þessum.

Er ekkert í ummælum þessum sem tengir nafn stefnanda sérstaklega við þann hóp kraftlyftingamanna sem yfirfyrirsögnin greinir frá, og ekki er gerð grein fyrir í fréttinni hverjir þeir áhrifamenn í Kraftlyftingasambandi Íslands eru, sem ekki hafi viljað ganga í ÍSÍ. Nafn stefnanda kemur þar hvergi við sögu og verður ekki talið að stefnandi geti fengið ómerkt ummæli sem þannig beinast að ótilgreindum hópi manna.

Sú óljósa tenging stefnanda við ofangreind tvenn ummæli, sem hann telur felast í síðustu ummælunum sem hann krefst ómerkingar á: Í raun eru tveir menn sem stjórna eiginlega öllu. Þar á hún við þá Auðun Jónsson og Hjalta Úrsus Árnason, en hvorugur þeirra situr í stjórn sambandsins” lýsir aðeins þeirri skoðun viðmælanda blaðsins, að þeir Auðunn Jónsson og stefnandi stjórni eiginlega öllu í Kraftlyftingasambandinu, en jafnframt kemur fram í fréttinni að hvorugur þeirra sitji í stjórn sambandsins.

Skoðanir manna, sem ekki eru settar fram á ærumeiðandi hátt, eins og síðastgreind ummæli, verður að telja innan marka þess tjáningarfrelsis sem varið er af 72. gr. stjórnarskrárinnar," að því er segir í niðurstöðu héraðsdóms.