Reykjavíkurborg getur ekki komið til móts við alla og getur ekki endurgreitt þeim fjölskyldum sem keyptu byggingarrétt á lóðum á markaðsvirði í útboði borgarinnar árið 2006. Þetta segir Óskar Bergsson, formaður borgarráðs og framkvæmda- og eignaráðs.

Borgin fékk 970,5 milljónir króna fyrir lóðirnar í Úlfarsfelli í úboðinu 2006 frá einstaklingum og 1.884,5 milljónir frá lögaðilum, samkvæmt upplýsingum framkvæmda- og eignasviðs borgarinnar.

Fimm manna fjölskylda gagnrýnir harðlega að fá ekki að skila lóð sem hún keypti á 14,5 milljónir króna í Úlfarsfelli í Reykjavík. Lóðina greiddu þau með erlendu láni, sem hefur hækkað. Fjölskyldan stefndi á að byggja 200 fm einbýlishús með íbúð fyrir fatlaðan son.

Tvö barnanna eru á grunnskólaaldri og gagnrýnir móðirin að borgin reyni að þvinga hana til að byggja án þess að bjóða á móti þjónustu, eins og grunnskóla, sem lofað var. Móðurinni finnst stefna borgarinnar harðneskjuleg. Gefinn hafi verið lengri frestur til þess að byggja á lóðinni, en allir framkvæmdafrestir eru framlengdir um tvö ár. Hún vilji hins vegar skila lóðinni, þar sem engar forsendur séu til að byggja. Teikningum og öðrum undirbúningi var lokið en hún geti ekki tekið lán til þess að ráðast í framkvæmdirnar. Hún hafi viljað fá lóðina endurgreidda svo hún geti greitt af íbúðalánum fjölskyldunnar og staðið undir erlenda láninu, annars sé fjölskyldan tæknilega gjaldþrota. Fjölskyldan hefur leitað til lögfræðings. Hún segir að jafnræðis sé ekki gætt. Fyrirtæki sem fengu byggingarrétt á lóðum geti sótt um að skila þeim og fengið það með sérstakri heimild borgarráðs hverju sinni en þau ekki.