Sr. Magnús Erlingsson var einstaklega áhugasamur um matreiðslu Halldórs og Katrínar. mynd/Bæjarins besta

Hjónin Halldór Hermannsson og Katrín Gísladóttir á Ísafirði buðu skyldmennum sínum og vinum til skötuveislu í hádeginu í dag. Var þétt setið við eldhúsborðið á heimili þeirra enda þykir það afar eftirsóknavert að komast í skötuveislu til Halldórs því matreiðsla hans á skötu er fyrir löngu orðin goðsagnakennd, að því er fram kemur á vestfirska fréttavefnum Bæjarins besta.

Hefur hann m.a. haldið fjölmörg námskeið er varða matreiðslu á skötu. Sr. Magnús Erlingsson var einn af gestunum í skötuboðinu og fylgdist hann einstaklega vel með eldamennskunni. Halldór segir skötumatreiðsluna hafa tekist einstaklega vel í ár. „Ég fékk skötuna frá Jóa Bjarna á Suðureyri og reyndist hún okkur einstaklega vel. Skatan tókst mjög vel og allir hamingjusamir með hana og átu hana af bestu lyst,“ segir Halldór.

Hann segist hafa þróað sína eigin aðferð við að elda skötu og að hún sé alveg sér á báti. „Svo smakkaði ég einnig skötu frá Lions og vil ég votta félaginu virðingu mína fyrir vel verkaða skötu. Það mátti varla á sjá hvor skatan er betri, frá Jóa eða Lions. Sveinn Guðbjartsson hjá Lions hefur verkað skötuna einstaklega vel og er búinn að taka af mér nafnbótina sem aðalsérfræðingur í skötuverkun. Nú er það hann sem heldur skötufyrirlestrana ekki ég,“ segir Halldór.

Halldór segist enn standa fastur á því að skata auki kynlöngun og til marks um það nefnir hann að flest börn á Vestfjörðum séu fædd í september. „Það magnast kynlöngun þeirra sem borða skötu alveg um helming og eftir að ég sagði það í útvarpi fyrir nokkrum árum rauk sala á skötu upp úr öllu valdi,“ segir Halldór.