Vilji er til þess á meðal fulltrúa Geysis Green Energy (GGE) og Reykjanesbæjar í stjórn HS-Orku að afnema forkaupsrétt eigenda í félaginu, samkvæmt heimildum Morgunblaðsins. Til stóð að halda hluthafafund í HS-Orku, sem er eigandi orkuvera Hitaveitu Suðurnesja (HS), í dag. Fundinum var þó frestað þar sem hann var ekki boðaður með réttum hætti.

Meðal þess sem til stóð að ræða á fundinum var afnám forkaupsréttar eigenda og tilboð Reykjanesbæjar í allar auðlindir sem eru í félaginu. Reykjanesbær vill borga fyrir auðlindirnar, jarðhitaréttindin og löndin sem þau eru á með hlutabréfum í HS-Veitum, en auðlindirnar eru sem stendur inni í HS-Orku.

Verði forkaupsrétturinn felldur niður geta Reykjanesbær og GGE skipt á hlutabréfum sínum í HS-Veitu og HS-Orku. Eftir það yrði Reykjanesbær meirihlutaeigandi í HS-Veitum en GGE meirihlutaeigandi í HS-Orku. Fulltrúar Hafnarfjarðar og Orkuveitu Reykjavíkur (OR) í stjórn HS reyndu að leggja fram hluthafasamkomulag sem að þeirra sögn var til þess gert að tryggja hagsmuni minnihlutans. Því samkomulagi var hafnað. Í kjölfarið samþykkti OR að selja hlut sinn í Hitaveitu Suðurnesja. Grindavík og Vogar hafa bæði óskað eftir því að fá að kaupa auðlindir innan sinnar lögsögu. Þau þurfa þó að greiða fyrir með fjármagni en Reykjanesbær getur greitt fyrir með hlut sínum í HS-Orku.