Líkt og hefð er fyrir hafa margir nýtt sér daginn í dag til að huga að leiðum látinna ástvina í kirkjugörðum borgarinnar. Að sögn Þórsteins Ragnarssonar, forstjóra Kirkjugarða Reykjavíkurprófastsdæma, hefur dagurinn gengið vel. Sömuleiðis hafi allt gengið vel í gær þrátt fyrir rysjótt veður.

„Þetta hefur verið jafnt og þétt. Núna sem stendur er mikil umferð í Fossvogi og ekki er annað að sjá og heyra en að þetta gangi vel fyrir sig. Umferðin er alveg þokkalega greið í kringum stóru garðana,“ segir Þórsteinn í samtali við mbl.is.

Hann segir að margir hafi mætt í garðana kl. 9 í morgun þegar þeir opnuðu. Starfsmenn séu til aðstoðar Fossvogskirkjugarði, Gufuneskirkjugarði, Kópavogskirkjugarði og Hólavallagarði. Þeir aðstoða fólk við að finna leiði og afhenda ratkort ef með þarf.

Aðalskrifstofa í Fossvogskirkjugarði, sími: 585 2700 og skrifstofan í Gufuneskirkjugarði, sími: 585 2770 eru opnar frá kl. 9 - 15 og geta aðstandendur fengið upplýsingar um leiði þar.

Lögreglan fylgist sérstaklega með umferð við Fossvogskirkjugarð og Gufuneskirkjugarð og mun greiða fyrir umferð eins og hægt er.

Að sögn lögreglu verður umferð í Fossvogskirkjugarð takmörkuð og aðeins heimil þeim sem framvísa svokölluðu P-merki. Ökumönnum er bent á bílastæði við Fossvogskirkju, Öskjuhlíðarskóla og í Vesturhlíð. Lokað verður fyrir gegnumakstur í Öskjuhlíð, þ.e. Vesturhlíð að Flugvallarvegi, en Suðurhlíð verður opin inn á Kringlumýrarbraut í gegnum planið hjá N1 í Fossvogi.

Aðkoma að Gufuneskirkjugarði verður eingöngu frá Hallsvegi. Starfsfólk Kirkjugarða Reykjavíkurprófastdæma stýrir umferðinni inni í kirkjugarðinum og verður um einskonar hringakstur að ræða. Farið er út úr Gufuneskirkjugarði norðanmegin og inn á Borgaveg. Ökumenn er beðnir um að aka Borgaveg í vestur og þaðan um Strandveg. Með þessu móti minnkar álagið á Víkurveg og Hallsveg og greiðir fyrir umferð þeirra sem eru að koma í kirkjugarðinn.