Forráðamönnum geðdeildar Sjúkrahússins á Akureyri (FSA) er gert að skera niður um 6% í rekstri á næsta ári, alls 17,5 milljónir króna. Yfirlæknir göngudeildar geðdeildarinnar segist hafa miklar áhyggjur vegna þess að ekki verði hjá því komist að draga úr þjónustu; geðdeildin hafi ekki getað sinnt eftirspurn að fullu í ár og fyrirhugaður niðurskurður bæti ekki ástandið.

„Enn hafa ekki verið teknar ákvarðanir um það hvernig verður skorið niður en ég hef miklar áhyggjur af því hvernig við verðum í stakk búin eftir áramótin,“ sagði Árni Jóhannesson, yfirlæknir göngudeildar geðdeildar FSA, við Morgunblaðið í gær. Hann segir starfsmenn deildanna nú þegar verða vara við áhrif fjárhagskreppunnar á skjólstæðinga sína.

Eitt af því sem kemur til greina er að sameina göngudeild og dagdeild geðdeildar, sem gæti í raun þýtt að dagdeildin verði lögð niður, en þangað sækir fyrst og fremst þjónustu fólk sem lengi hefur átt við geðræna erfiðleika að stríða og þarf fjölþættari og lengri endurhæfingu en aðrir. Stöðugildi á dagdeild eru sex og 35-40 manns hafa sótt þjónustu þangað.

Halldór Jónsson, forstjóri FSA, segir að skv. nýsamþykktum fjárlögum þurfi FSA að lækka útgjöld um 250-300 milljónir króna á næsta ári og sú upphæð verði ekki auðveldlega hrist fram úr erminni. Velta stofnunarinnar er fjórir milljarðar.

Halldór tekur fram að ekkert hafi verið ákveðið enn varðandi niðurskurðinn, en staðfestir að enginn þáttur rekstrarins sé í raun undanskilinn. Bráðaþjónustu þurfi ætíð að tryggja en nauðsynlegt sé, þegar um svo háar fjárhæðir sé að ræða, að hugsa ýmislegt upp á nýtt; m.a. að velta fyrir sér samlegðaráhrifum deilda. Farið hafi verið yfir stöðuna með öllum yfirmönnum og lausna sé leitað. Laun eru um 70% af rekstrarkostnaði sjúkrahússins og Halldór segir því erfitt að skera niður öðruvísi en starfsfólki fækki og við það verði þjónusta ekki sú sama og áður.