Útlendingar búsettir hér á landi í Alþjóðahúsinu mbl.is/Árni Sæberg

Dóms- og kirkjumálaráðherra hefur gefið út reglugerð um prófin sem tekur gildi um áramótin og er greint frá henni á vefriti ráðuneytisins. Samkvæmt henni er ráðgert að Námsmatsstofnun eða annar sambærilegur aðili annist undirbúning og framkvæmd prófanna sem haldin verða að minnsta kosti tvisvar á ári.

Þeir umsækjendur sem hafa lagt fram umsókn í dóms- og kirkjumálaráðuneytinu fyrir 1. janúar 2009 ásamt öllum tilskildum fylgigögnum, og fullnægja á þeim tímapunkti þeim skilyrðum laga um íslenskan ríkisborgararétt sem í gildi eru fyrir áramót, þurfa ekki að gangast undir íslenskupróf.

Þess ber hins vegar að geta að þótt umsækjandi hafi áður fengið búsetuleyfi og lokið íslenskunámi eða prófi vegna þess leyfis þarf hann engu að síður að undirgangast íslenskupróf vegna umsóknar um ríkisborgararétt. Í prófunum skal reynt á tal, hlustunarskilning, ritun og lesskilning. Umsækjandi þarf að hafa næga kunnáttu í íslensku til að geta bjargað sér við daglegar aðstæður í skóla, vinnu og einkalífi. Hann þarf að geta lesið og skrifað stutta texta á einföldu máli um kunnugleg efni og tekið þátt í umræðum um þau. Umsækjandi þarf að geta bjargað sér við óvæntar aðstæður, skilið einfaldar samræður og greint aðalatriði í ljósvakamiðlunum um kunnugleg efni.